新世界春茗豪送房車

【明報專訊】小琴冇耐前講過，做新世界發展（0017）小股東好唔好見仁見智，但同新世界打工一定係好事，皆因人稱彤叔嘅新世界主席鄭裕彤出名待員工不薄，最新例證就係新世界啱啱個公司春茗，頭獎係一部名貴房車，都咪話唔豪！

有圖有真相，睇返果晚啲相，幸運兒係一位年輕嘅男士，由純官鄭家純同佢公子鄭志剛親自頒獎，得獎者真係笑到合唔埋個口。不過有口痕友話，新世界作為發展商，應該送層樓，以此推論，周大福（1929）公司春茗要送南非巨鑽噃。


美女載歌載舞 兼有變臉表演

抽獎之外，新世界春茗其實都幾多嘢玩，除咗例牌搵咗班靚女來唱歌跳舞，仲有國術變臉表演，雖然表演者唔係劉華，但見3位變臉大師，變吓變吓變咗「新世界」3個字出嚟，都真係幾有舞台效果㗎！

email:piano@mingpao.com