基金一哥都要坐經濟艙

【明報專訊】全球經濟環境都麻麻，近年唔少金融機構都開始閂水喉，就連本地基金界一哥惠理（0806）都要cut cost，小琴噚日同惠理副行政總裁謝偉明食飯，佢話惠理上年花紅派得唔錯，而且無任何裁員行動，但為咗減低成本，員工出差budget就要減少，主席謝清海仲響應公司政策，自己扲荷包畀錢出差添！

基金經理出差一般都會坐商務艙同住好啲嘅酒店，不過阿Tim（謝偉明洋名）話，最近公司出咗新政策，以後基金經理無論出差去邊，一律要坐經濟艙，而住嘅酒店亦由以前無限制，變成只可以住4星級或以下嘅酒店，實行幫公司慳返筆。


副總裁﹕上年花紅派得唔錯

惠理基金經理李以立下個星期就要出差，小琴就話佢係新政策第一個「犧牲者」，佢就笑笑口話其實影響唔大，皆因公司平時出差都係返大陸多，經濟艙同商務艙其實無乜分別，就連謝生都好響應新政策，實行自己扲荷包畀錢出差。


阿Tim話，雖然近排金融界頻頻炒人，但係公司其實無乜受影響，唔單止無一個員工被裁，而且上年花紅仲算派得唔錯，希望今年基金表現好啲，可以再派好啲。


今年或換新寫字樓

佢仲話，公司其實一路仲想再擴充，近排一直都有留意中環、金鐘一帶嘅甲級寫字樓，如果有價錢啱而且位置好嘅寫字樓，可能會買返嚟做新寫字樓添！

email:piano@mingpao.com