福士響應環保 電動車現身展覽

【明報專訊】今時今日乜都講環保，寫字有環保紙，買嘢有環保袋，就連揸名牌車都有環保名牌車，好似福士（Volkswagen）最近就出咗款環保車，下個星期五（24日）起一連3日仲會嚟香港搞展覽，車迷隨咗睇之外，仲可以試揸電動車，唔知持有比亞迪（1211）嘅股民會唔會有興趣試呢？

呢個叫做「大眾e起來．駕馭藍創想」嘅電動車展覽，將會喺亞洲博覽館入面一個叫做「Volkswagen電動車主題公園」嘅位置度舉行，到時唔單止會有福士電動車示範車隊，仲有E-Golf電動車同Touareg Hybrid混能四驅車可以試揸添。


近呢幾年非常流行電動車概念，本土代表中電（0002）同電能（0006）都有份發展，兩家公司都會派高層去參與今次呢個電動車展覽，不過，講到環保車概念，唔少人相信都會諗起比亞迪，小琴覺得，如果投資者想投資呢類電動車概念股，可以考慮到時去試吓揸電動車，話唔定會對你嘅投資決定有用㗎。