當年揹40磅電腦跑歐洲

【明報專訊】噚日灣仔會展都算星光熠熠，事關貿發局同亞太經合組織商貿諮詢理事會（ABAC）合辦嘅APEC中小企業峰會除咗搵嚟「上海姑爺」羅康瑞做嘉賓主持之外，仲請到台灣女首富王雪紅、渣打集團（2888）香港總裁洪丕正、利豐（0494）副主席馮國綸同萬科地產主席王石嚟演講，大爆自己創業經歷。


HTC輕巧概念 始於歐洲行

好似王雪紅咁，佢就唔靠有台灣經營之神之稱嘅老豆王永慶，自己赤手空拳打江山嘅事迹可能好多人都知，但佢噚日自爆，當年為咗推銷電腦主機板，一個弱質女流揹住部40磅重嘅手提電腦響歐洲四圍跑，當時佢就憧憬，如果有朝一日部40磅電腦可以變得同手機一樣咁細咁輕係幾咁好。就係呢個諗法，令王雪紅間HTC致力發展智能手機市場。


至於另一名出席者馮國綸原來撞正噚日生日，行家知道後當然同佢講聲生日快樂，但馮國綸話冇準備點樣大事慶祝喎，佢仲透露，自從2009年60大壽之後，都唔想點慶祝自己生日。佢咁講，唔通暗示自己「不敢言老」？