亞太衛星程總稱 溫總囝囝官不大

【明報專訊】亞太衛星（1045）個控股股東中國衛星通信集團公司（China Satellite Communications Co）早排宣布，委任原副董事長、總理溫家寶長子溫雲松為董事長，亞太衛星股價即時「升空」，急彈超過兩成。小琴同亞太衛星總裁程廣仁傾開，佢話實在唔明投資者點解咁大反應，笑笑口話「其實溫（在集團）官不大嘛。我跟不少高官後代共事過，沒啥大不了。」


不清楚他曾做私募基金

程總話溫雲松畢業即加入中國航天（中國衛星通信母公司），幾年後由公司送佢放洋留學，之後又再返航天打工，早兩年就調咗去中國衛星通信，結果坐埋董事長個位。至於溫雲松搞私募基金單嘢，程總就顯得一臉無知，要小琴話番佢知，溫雲松早幾年成立咗隻新天域，專門投資新股。程總就淡淡然咁話，有能者係多人搵㗎喇。


雖然程總對於公司股價催化劑溫雲松冇乜特別感覺，不過講起公司股價噚日跌咗接近一成，佢就有啲勞氣，話公司交咗份靚仔成績表又派埋息，每股資產值超過4蚊，現價得2個幾都仲要跌，話有啲諗唔明喎。