燕窩莊兼賣日食品幫補

【明報專訊】近期人民幣升到澎澎聲，參茸海味店同內地訂貨，都呻成本增加咗好多。樓上燕窩莊老闆侯君剛話，人民幣升值，令佢哋好難預算成本；加上內地消費力提高，好多產品都畀內地搶高咗個價，例如杞子，佢發現批發價年年提高，但門市又好難加價，「啲客會話我哋以前賣開好平，家年年加價，生意做大咗就唔老實」。 到日本採購 廠家熱情招待 侯老闆就諗，不如開拓多啲食物種類。佢見到喺香港專賣日本嘢嘅超市愈開愈多，香港人對日本食品咁有興趣，就打算分一杯羹。不過，早於2005年佢都去過日本採購食物返香港，但當時好多日本老闆話唔做外銷，令佢哋食閉門羹。但佢今年重臨舊地，發現廠家態度好唔同，反應熱烈好多，「平時只係同廠商一兩位課長會面，但今次佢哋擺晒陣，5至10個管理層，會長、社長都嚟埋，佢哋係咁鞠躬，話希望有機會合作」。 侯老闆又話，佢哋訂貨唔算多，但日本廠家都提供很大彈性，令佢哋感到意外，「日本某啲食物味道較甜，香港人未必咁接受。日本廠家就話可以調整生產線，遷就本港口味」。佢感覺到日本經濟真係面臨好大壓力，所以要爭取外銷，樣樣都有商有量。不過，日圓都經常變動，侯老闆話如果上落唔大，就自己啃啦。 盼拓年輕市場增加客源 今次佢哋去日本採購咗好多零食、調味料、醬料、米，仲有最適合「無飯煮婦」嘅急凍熟食，弄熱後可以即刻食。不過，樓上燕窩莊賣開參茸海味，幫襯客路多數係成熟型、媽咪級。但日式食品較吸引年輕市場，點吸引班後生仔女入舖呢？侯老闆話，希望畀現有顧客多啲選擇，亦吸引多一批客源。 樓上舖最大賣點係租金較平，唔經唔覺，佢哋已經有20間分店，7月尾先喺其中12間舖加設日本產品區，仲有特別裝修同擺設，其他分店都會陸續開拓日本區。近期賣地價錢咁好，會唔會受影響樓上舖嘅租金？侯老闆話要睇地區，不過租金佔佢哋整體成本相對較低，喺一成以內。根據近期資料，旺角嘅樓上舖同地舖嘅租金，相差達9成。樓上舖係冇咁方便，但佢話仍然有吸引力。 報料電郵﹕piano@mingpao.com