博士蛙訂3酒店 招待逾百嘉賓

【明報專訊】博士蛙（1698）上市熱烘烘，首日果如暗盤一樣，勁升四成，股價氣勢如虹，連邀請嚟香港出席慶祝活動嘅嘉賓人數，都好勁。小琴風聞，博士蛙總共請咗過百名內地嘉賓來港，由於嘉賓人數多，一時間訂唔切酒店房，所以訂咗3間酒店，先至應付到咁多人。

據聞，3間酒店分別係中環四季酒店、金鐘香格里拉、同埋銅鑼灣一間酒店。小琴心想，博士蛙啲嘉賓陣容咁爆，爆足3間酒店，唔知點安排嘉賓住酒店，例如邊啲嘉賓住四季，邊啲要住銅鑼灣乜酒店。分分鐘某貴賓安排住喺銅鑼灣嗰間，唔知會唔會唔開心哩。

金風嘉賓200人 酒店業受惠

講開又講，唔單止博士蛙嘉賓多，遲啲來港上市的金風（2208，搞風電設備嘅深A股），嘉賓人數仲大陣仗，好似話多到達200幾人，足足係博士蛙嘅double，睇嚟港島一帶酒店嘅收益，真係想唔發都幾難。