大棋局：無法期待A股牛市

【蘋果日報】
靚仔嘅升勢通常升三段，A股第一段已完，第二及第三段難以期待。承前文，上證指數2400至2600點為斬倉位，即大量上市公司老細高位時拎股票去抵押，跌到此水位就會被斬倉。為免引發斬倉潮，內地政府就會行政干預，例如唔畀證券行斬倉。
無論係此水位入市之大戶投資者，還是被鎖死無法沽貨的上市公司老細，都需要三成水位先有得郁。故上證第一個賣壓在3100至3300點。上星期上證最高見3129點後開始回吐，而且連續多日破萬億（人民幣，下同）大成交。呢一段升勢，係挾嚟畀將被斬倉嘅股票鬆綁。
在政府角度，A股有短長兩個問題。跌到斬倉線，原本大量股票要斬倉，又怕斬倉潮引發股災止唔到瀉，引爆金融系統風險。內地官方多次強調要管理好金融風險，要金融維穩。迫在眉睫要解決的，係先挽救斬倉貨再講嘢，其他都係次要。此為短線要解決之問題。
金融，有分直接金融及間接金融。公司自己發債、印股票籌旗，係直接金融；問銀行借錢，係間接金融。中國金融體系落後，長期依賴間接金融，要搞番旺A股個場講咗十幾年。然而A股特色係大股當妖股炒，每一次都係急爆一下引人入場，即劏，就玩完。
萬億成交未必好事
整個場被玩爛玩謝，習近平早前指「金融是國家重要的核心競爭力，金融安全是國家安全的重要組成部份」，其中一點，意謂需要恢復股市原本的正常功能。此為長線要解決之問題。
因此官方政策，唔會再畀你亂放孖展炒爆。炒上就你自己袋，炒爆就叫共產黨打救，仲得了？無法期待出現2015年風潮，此其一。不止中國經濟下行，歐洲經濟亦繼續仆直。就算未發生貿易戰前，據世界銀行數據，全球貿易量已不斷收縮，無法期待基本因素推動牛市，此其二。人民幣貶值壓力極大，尤其美元今年應該要再轉強，中國更唔敢放水。美國減稅，上市公司老細會回購；中國減稅，上市公司老細會拎股票去抵押再借多啲，到時再拖住先甚至唔還，為質之分別，無法期待大水漫灌托市，此其三。
最重要係，由習近平講話開始，A股不停破萬億成交，係入場，定走貨？如果係走貨，大戶控場力大減，一跌更收唔到掣。托住在3000幾點橫行已係最理想狀態，有冇第二段升勢再睇，隨時3129點已係反彈尾聲。
Mr. Tregunter
本欄逢周二刊出資料來源：蘋果日報2019年3月12日

長青網 - 一站式長者及護老者生活資訊網站