湯彥麟忙於日震 離任無搞歡送會

【明報專訊】湯彥麟周四完成國泰航空33年嘅旅程，向國際航空運輸協會（IATA）進發。佢離任國泰CEO之前完成晒公司業績，諗住工作七七八八，仲約定3月中同傳媒茶聚舉行小型歡送會。但日本突然發生地震、海嘯，湯彥麟要忙於應付工作，所以取消傳媒聚會。據知國泰內部都忙到氹氹轉，冇特別安排大型歡送活動。

歷任CEO 皆有好着落

湯彥麟喺2007年獲委任為國泰行政總裁，呢幾年見證公司起落，包括2008年金融海嘯，國泰業績首次虧損。短短兩年後，國泰就由谷底彈上高峰，去年盈利140億元，創下公司新紀錄。湯彥麟離開國泰後，繼續做航空相關業務。數番歷任國泰行政總裁離職後新工作，都各有不同。陳南祿（2005至2007年）家喺恒隆地產（0101）擔任董事總經理，進軍地產。唐寶麟 David Turnbull（1998年至2005年）現時出任太平洋航運（2343）主席，由航空到海上，同運輸界都有淵源。再上一手嘅艾廷俊（Rob Eddington）離開國泰後，做過英航行政總裁，家喺梅鐸嘅新聞集團（News Corporation）做董事。