艾爾敦獲匯控總裁邀出山

【明報專訊】匯控（0005）中東呢頭先裁員3%，嗰頭又搵個重量級人馬入局，邊個咁巴閉？咪就係匯豐前亞太區一哥艾爾敦（David Eldon）囉！佢喺匯控退休啱啱好6周年，面對行政總裁歐智華邀請盛情難卻，重返「發迹地」中東，擔任中東匯豐銀行非執行董事兼主席，5月1日起生效。

今次艾爾敦重作馮婦，小琴即刻搵佢現身說法，佢話歐智華升職揸旗匯控後，就即刻搵佢返娘家，歐智華以前都係睇開匯控中東業務，當然要搵個勁人坐鎮啦！艾爾敦考慮一番，佢話一來佢喺迪拜國際金融中心管理局（Dubai International Financial Centre Authority）主席任期完結，二來又覺得同中東一直淵源甚深，因為佢喺1968年時就係喺迪拜加入匯控，其後喺中東工作咗11年，先嚟香港，於是接受任命！

曾在中東工作11年

雖然艾爾敦今年已經66歲，但大班嘅豪邁本色不減，「我有魄力，亦願意作出貢獻！」（I still have the energy and willingness to contribute）嚟緊佢都會繼續駐紮香港，遙控中東匯豐業務。

金管局蔡耀君 出山去交行

無獨有偶，前金管局副總裁蔡耀君（䁥稱YK）上年退休後，對銀行界都係心癢癢，YK獲交行（3328）委任為獨立非執董，中銀監批准後就可履新。同舊老細任總一樣，大家都係揀向祖國銀行服務，交行同建行（0939）有呢兩位前金管局猛人坐鎮，真係可喜可賀！

報料電郵﹕piano@mingpao.com